“ආයුබෝවන් පුංචි යාළුවනේ.

ඔබ මා දන්නවාද?

ඔව්, මම තමයි ඒ ගොඩක් බඩගින්නේ ඉන්න දළඹුවා.

අද මම ලෝකයේ රටවල් ගණනාවක ළමයින්ගේ මිතුරෙකු වී සිටිනවා. නමුත් මගේ ගමන ආරම්භ වූයේ ඉතා කුඩා බිත්තරයක් ඇතුළේ සිටයි.

එක් ඉරිදා උදෑසනක මම බිත්තරයෙන් එළියට ආවා. මට හරිම බඩගිනි. ඒ නිසා මම කෑම සොයන්න පටන් ගත්තා.

සඳුදා ඇපල් ගෙඩියක් කෑවා.

අඟහරුවාදා පෙයාස් ගෙඩි දෙකක් කෑවා.

බදාදා ප්ලම් ගෙඩි තුනක් කෑවා.

ඒත් මගේ බඩගින්න තවමත් නැති වුණේ නැහැ.

ඉතින් මම තව තවත් කෑවා.

අවසානයේ මම ලොකු දළඹුවෙකු වුණා. ඉන් පසු මම කෝෂයක් තුළ නිදාගත්තා.

දින ගණනාවකට පසු මම නැවත එළියට ආවා.

එදා මම දළඹුවෙක් නොවෙයි.

මම දැන් ලස්සන සමනලයෙක්!”

මේ කතාව ලොව පුරා මිලියන ගණනක් දරුවන්ගේ සිත් දිනාගත් “The Very Hungry Caterpillar” නම් කෘතියේ කතාවයි.

මෙහි නිර්මාතෘ වූයේ එරික් කාර්ල් (Eric Carle) නම් අපූරු ළමා ලේඛකයා සහ චිත්‍ර ශිල්පියාය. ඔහු 1929 දී ඇමරිකාවේ නිව්යෝර්ක් නගරයේ උපත ලැබූ අතර ළමා ලෝකය වර්ණවත් චිත්‍ර සහ සරල කතා මගින් ආලෝකවත් කළා .

1969 දී ප්‍රකාශයට පත් වූ “The Very Hungry Caterpillar” අද වන විට ලොව වඩාත්ම ජනප්‍රිය ළමා කෘති අතරින් එකකි. එය භාෂා 60 කට වැඩි සංඛ්‍යාවකට පරිවර්තනය වී ඇති අතර පිටපත් මිලියන ගණනක් අලෙවි වී තිබේ.

මේ පොතේ විශේෂත්වය වන්නේ එය කතාවක් පමණක් නොවීමයි. ළමයින්ට ගණන් කිරීම, සතියේ දින හඳුනා ගැනීම, පලතුරු සහ ආහාර ගැන දැනගැනීම, සහ ජීවිතයේ වෙනස්වීම් ගැන ඉගෙන ගැනීමටද එය උපකාරී වේ.

නමුත් දරුවන් මෙම පොතට ආදරය කරන්නේ පාඩම් නිසා නොවේ.

ඔවුන් ආදරය කරන්නේ පුංචි දළඹුවාටයි.

මොකද ඔහු ඔවුන් වගේම කුතුහලයෙන් පිරුණු, බඩගිනි වන, ලෝකය සොයා යන පුංචි මිතුරෙක්.

ඒ නිසාම වසර පනහකටත් වැඩි කාලයකට පසුවත්,බඩගිනිකාර දළඹුවා තවමත් ලොව පුරා දරුවන්ගේ හදවත් තුළ ජීවත් වෙයි.